Համակարգի մասին

ՀՀ կառավարության 2014 թվականի սեպտեմբերի 4-ի N 942-Ա որոշմամբ հաստատված «http://www.tundardz.am տեղեկատվական ինտերնետային համակարգի սպասարկման կարգի» համաձայն գործարկվել է «Տունդարձ» տեղեկատվական համակարգը, որը ստեղծվել է օտարերկրյա պետություններից Հայաստանի Հանրապետություն վերադարձի մտադրություն ունեցող քաղաքացիներին (ինչպես նաև երկքաղաքացիներին) աջակցելու համար:

ՀՀ ՏԿԵՆ միգրացիոն ծառայությունը տեղական, միջազգային հասարակական կազմակերպությունների և պետական շահագրգիռ գերատեսչությունների հետ համագործակցությամբ, աշխատանքներ է իրականացրել համակարգը նորացնելու, այնտեղ տեղ գտած տեղեկատվությունը թարմացնելու ուղղությամբ:

Համակարգը այցելուներին հնարավորություն է ընձեռում ստանալ օգտակար տեղեկատվություն վերադարձի և հայրենիքում վերաինտեգրման գործընթացների, այս ոլորտում իրականացվող ծրագրերի վերաբերյալ, ինչպես նաև ուղարկելու առցանց հաղորդագրություն Հայաստան վերադարձի և վերաինտեգրման գործընթացների հետ կապված հարցերի վերաբերյալ:

Համակարգը կազմված է «Գլխավոր» էջից, Համակարգի մասին ընդհանուր տեղեկություններ պարունակող բաժիններից, «Մուտք/Գրանցվել» դաշտից, ինչպես նաև «Որոնում» գործիքից:

«Գլխավոր» էջում զետեղված են ընդհանուր տեղեկություններ համակարգի մասին, պարբերաբար ներկայացվում են  ոլորտի նորությունները, թեմայի վերաբերյալ լրատվական նյութերը, ինչպես նաև առկա է հաճախ տրվող հարցերի դաշտ, որտեղ Դուք հեշտությամբ կարող եք գտնել վերադարձի և վերաինտեգրման գործընթացներում ներգրավված պետական կառույցների գործունեության ոլորտներին առնչվող, ամենից հաճախ ծագող հարցերի պատասխանները:

Համակարգի մասին ընդհանուր տեղեկություններ պարունակող բաժիններն են`

1. «Համակարգի մասին»
2. «Ինչպե՞ս օգտվել համակարգից»
3. «Հաճախ տրվող հարցեր»
4. «Գործընկերներ»
5. «Վերադարձի ծրագրեր»
6. «Վերադարձի և վերաինտեգրման պատմություններ»
7. «Օգտակար տեղեկատվություն վերադարձողների համար»
8. «Վիճակագրություն»
9. «Նորություններ»
10. «Կապ մեզ հետ»

Գրանցվելով կայքում՝ Դուք ստեղծում եք Ձեր անձնական էջը և կարողանում եք մուտք գործել համակարգ՝ վերադարձի և վերաինտեգրման գործընթաց­ների հետ կապված Ձեզ հուզող ցանկացած հարց առցանց եղանակով համապատասխան մասնագետ­ին ուղղելու նպատակով: Կայքում գրանցվելը հնարավորություն է տալիս օգտատիրոջն իր անձնական էջում պահպանել, հարկ եղած դեպքում՝ հետագայում ևս շարունակել իր նամակագրությունը:

Համակարգի յուրաքանչյուր էջում տեղակայված է «Որոնում» գործիքը, որի միջոցով այցելուն կարող է բանալի բառերի օգնությամբ մուտքագրել իր հարցումը՝ իրեն անհրաժեշտ և հետաքրքրող տեղեկատվությունը փնտրելու համար:

Համակարգում տեղեկատվությունը հասանելի է հայերեն, ռուսերեն և անգլերեն տարբերակներով:

Համակարգի տեխնիկական ուղեկցումն ապահովում է ՀՀ ՏԿԵՆ միգրացիոն ծառայությունը:

Համակարգի լրամշակման աշխատանքներում ՀՀ ՏԿԵՆ միգրացիոն ծառայությանն աջակցում է Միգրացիոն քաղաքականության զարգացման միջազգային կենտրոնի (ICMPD) Վերադարձի և վերաինտեգրման եվրոպական ցանցի (ERRIN) «Աջակցություն Հայաստանին միգրանտների վերադարձի և վերաինտեգրման գործընթացում» ծրագիրը։